TAMWA Zanzibar Yaitaka Polisi Kuharakisha Uchunguzi wa Kifo cha Mwanafunzi Raiyan

NA ABDUL SAKAZA.

Chama cha Waandishi wa Habari Wanawake Tanzania, Zanzibar (TAMWA-ZNZ), kimeitaka Jeshi la Polisi Zanzibar kuharakisha na kufanya uchunguzi wa kina kuhusu kifo cha Raiyan Hemed Amour, mwenye umri wa miaka 15, mwanafunzi wa kidato cha kwanza katika Skuli ya Sekondari Kizimbani, Wilaya ya Wete, Mkoa wa Kaskazini Pemba.

TAMWA-ZNZ imesema mwili wa Raiyan ulidaiwa kukutwa katika kichaka ukiwa na jeraha katika kiganja cha mkono wa kulia, hali ambayo imeibua maswali kuhusu mazingira ya kutoweka kwake na hatimaye kifo chake.

Kwa mujibu wa taarifa ya Jeshi la Polisi iliyotolewa Oktoba 5, 2026, Raiyan aliondoka nyumbani kwao katika Kijiji cha Kwale Mpona, siku ya Ijumaa Oktoba 2, 2026, majira ya saa 12:00 asubuhi kwa ajili ya kwenda skuli, lakini baadaye mwili wake ulionekana katika kichaka akiwa amefariki dunia.

Katika tamko lake, TAMWA-ZNZ imelitaka Jeshi la Polisi kufanya uchunguzi wa haraka, wa kina na wa haki ili kubaini mazingira ya kutoweka kwa mwanafunzi huyo, chanzo cha kifo chake pamoja na kuwabaini watu waliohusika, endapo watapatikana, na kuwachukulia hatua kwa mujibu wa sheria.

TAMWA-ZNZ imesema hatua madhubuti dhidi ya wahusika ni muhimu katika kuhakikisha haki inatendeka kwa marehemu na familia yake, sambamba na kujenga imani ya wananchi katika mifumo ya haki na ulinzi wa watoto.

Chama hicho pia kimesisitiza kuwa Serikali na mashirika yasiyo ya kiserikali yamekuwa yakifanya juhudi mbalimbali katika kuimarisha haki na ulinzi wa wanawake na watoto, ikiwemo kuhakikisha watoto wa kike wanapata fursa sawa za elimu, ulinzi na kushiriki katika maendeleo ya jamii.

Aidha, TAMWA-ZNZ imeitaka Serikali kupitia mamlaka husika kuimarisha usalama wa watoto wanapokwenda na kurudi skuli. Imeeleza kuwa maeneo hatarishi kama vichaka vilivyo karibu na makazi ya watu na njia zinazotumiwa na watoto yanapaswa kupunguzwa au kuondolewa ili kupunguza hatari zinazoweza kuwakabili watoto, hususan wasichana.

Kuhusu uwajibikaji wa taasisi za haki, TAMWA-ZNZ imesema imekuwa ikishauri Jeshi la Polisi na taasisi nyingine zinazohusika na haki kutoa taarifa kuhusu hatua zinazofikiwa katika kushughulikia kesi za ukatili, huku ikizingatiwa sheria na taratibu zinazolinda taarifa nyeti za waathirika na watoto.

 

Kwa mujibu wa TAMWA-ZNZ, tangu mwishoni mwa mwaka 2016 imeshuhudia jumla ya matukio 34 ya mauaji yaliyowahusisha wanawake 27 na watoto saba, huku jamii ikiwa haijajulishwa ipasavyo kuhusu mwenendo wa baadhi ya kesi hizo na hukumu zake.

TAMWA-ZNZ pia imeihusisha hali hiyo na utekelezaji wa Malengo Endelevu ya Maendeleo (SDGs), hususan Lengo la Tano linalolenga usawa wa kijinsia na kuondoa ukatili dhidi ya wanawake na wasichana, pamoja na Lengo la 16 linalohimiza jamii zenye amani, upatikanaji wa haki kwa wote na taasisi zinazowajibika na kufanya kazi kwa ufanisi.

Sambamba na hilo, chama hicho kimeiomba Wizara ya Elimu na Mafunzo ya Amali kwa kushirikiana na Wizara ya Afya kutoa huduma na msaada wa kisaikolojia kwa watoto wanaoishi Kijiji cha Kwale na maeneo yanayozunguka tukio hilo.

TAMWA-ZNZ imesema msaada huo ni muhimu kwa watoto ambao wanaweza kuwa wameathirika kwa hofu, msongo wa mawazo au mshtuko kutokana na tukio hilo, ili waweze kuendelea na shughuli zao za kila siku bila kubeba madhara ya muda mrefu ya kisaikolojia.

TAMWA-ZNZ imetoa pole kwa familia, ndugu, jamaa, walimu na wanafunzi wenzake Raiyan Hemed Amour kufuatia msiba huo, huku ikiomba Mwenyezi Mungu ailaze roho ya marehemu mahali pema peponi na kuwapa wafiwa subira na nguvu katika kipindi hiki kigumu.