SERIKALI YAENDELEA KUIMARISHA MAPAMBANO DHIDI YA USAFIRISHAJI HARAMU WA BINADAMU ZANZIBAR

Na Said Kamis.

Serikali ya Mapinduzi ya Zanzibar kupitia Wizara ya Maendeleo ya Jamii, Jinsia, Wazee na Watoto imeeleza kuwa itaendelea kushirikiana na wadau mbalimbali katika kuweka mikakati madhubuti ya kukabiliana na tatizo la usafirishaji haramu wa binadamu nchini. Kauli hiyo imetolewa wakati wa ufunguzi wa mafunzo ya siku nne yaliyowakutanisha wadau kutoka sekta mbalimbali.

Akizungumza katika hafla hiyo iliyofanyika katika Hoteli ya Verde Mtoni, Mkoa wa Mjini Magharibi, Katibu Mkuu wa wizara hiyo, Abeida Rashid Abdallah, alisisitiza kuwa mapambano dhidi ya uhalifu huo yanahitaji ushirikiano wa karibu kati ya serikali, taasisi na jamii kwa ujumla ili kuweza kuutokomeza.

Abeida alieleza kuwa serikali haitochoka kutoa elimu kwa jamii kuhusu athari za usafirishaji haramu wa binadamu pamoja na mbinu zinazotumiwa na wahalifu. Alibainisha kuwa elimu hiyo itasaidia wananchi kutambua mapema viashiria vya uhalifu huo na kuchukua hatua stahiki kabla madhara hayajatokea.

Aidha, alifafanua kuwa serikali itaweka maofisa maalum katika maeneo muhimu ya usafirishaji kama bandarini na viwanja vya ndege ili kusaidia kugundua na kuzuia vitendo hivyo. Alisema maeneo hayo mara nyingi hutumiwa na wahalifu kama njia za kupitishia wahanga.

Katika hatua nyingine, serikali imeahidi kuimarisha huduma za makazi ya dharura kwa ajili ya wahanga wa usafirishaji haramu wa binadamu. Huduma hizo zitajumuisha msaada wa kisaikolojia, kiafya na kisheria ili kuwasaidia wahanga kurejea katika hali ya kawaida ya maisha.

Pia ilielezwa kuwa serikali itaendelea kuratibu juhudi za kuwarejesha wahanga katika familia zao za asili ili kurejesha mshikamano wa kijamii. Hatua hii inalenga kusaidia waathirika kujenga upya maisha yao baada ya kupitia changamoto kubwa.

Kwa upande wake, Mkuu wa Shirika la Umoja wa Mataifa la Uhamaji International Organization for Migration nchini Tanzania, Ken Heriel, alisema mafunzo hayo yanalenga kuongeza uelewa na uwezo wa wadau katika kupambana na usafirishaji haramu wa binadamu. Alieleza kuwa IOM inaendelea kushirikiana na serikali katika kutekeleza programu mbalimbali za ulinzi wa wahanga.

Mafunzo hayo yaliandaliwa na IOM kwa kushirikiana na Wizara ya Maendeleo ya Jamii, Jinsia, Wazee na Watoto, yakifadhiliwa na Serikali ya Norway, na yamewakutanisha maafisa ustawi wa jamii na wataalamu mbalimbali. Washiriki wamehimizwa kutumia maarifa waliopata kuimarisha mapambano dhidi ya tatizo hilo kuanzia ngazi ya familia hadi taifa