Walinda amani 6 wa UNISFA wauawa Sudan Mkuu wa UN amelaani vikali

 

Shambulio hilo limefanyika huko Kadugli, Kordofan Kusini, nchini Sudan, na kukatili maisha ya walinda amani sita wa Bangladesh na kujeruhi wengine wanane leo tatehe 13 Desemba 2025.

Katika taarifa iliyotolewa na msemaji wake kutoka Riyadh aliko ziarani, Katibu Mkuu alisema "Nailaaani vikali shambulio la kikatili la droni lililolenga kituo cha vifaa vya walinda amani wa Umoja wa Mataifa huko Kadugli, Sudan na kusababisha vifo vya walinda amani sita na kujeruhi wengine wanane, wote wakiwa wanahudumu katika kikosi cha walinda amani wa Bangladesh."

Ametuma rambirambi zake za dhati kwa familia za waliokufa, kwa Serikali pamoja na watu wa Bangladesh, akiongeza kuwa "Nawasilisha rambirambi zangu za dhati nakuwatakia wote waliyojeruhiwa afuweni ya haraka. Msaada unaendelea kutolewa kwa walinda amani waliojeruhiwa kabla ya kuhamishwa."

Vitendo hivi ni uhalifu wa vita

Katibu Mkuu amesisitiza uzito wa mashambulio dhidi ya wafanyakazi wa Umoja wa Mataifa, akibainisha kuwa matendo kama haya yanaweza kuhesabiwa kama uhalifu wa kivita chini ya sheria za kimataifa.
"Mashambulio yanayolenga walinda amani wa Umoja wa Mataifa yanaweza kuhesabiwa kuwa uhalifu wa kivita. Shambulio kama la leo huko Kordofan Kusini dhidi ya walinda amani halikubaliki. Kunapaswa kuwa na haja ya kuwajibishwa."

Amethibitisha msaada wake kwa walinda amani wa Umoja wa Mataifa wanaohudumu katika mazingira hatarishi wakiwa chini ya bendera ya samawati, akisema "Naonesha mshikamano wangu na maelfu ya walinda amani ambao wanaendelea kuhudumu chini ya bendera ya samawati ya Umoja wa Mataifa katika mazingira hatarishi zaidi."

UNISFA

 

Walianda amani wa kikosi cha Pakistan kwenye mpango wa UNISFA wakitoa huduma za afya Abyei

Mazungumzo ya amani ni muhimu

Mwishowe, Katibu Mkuu alirudia wito wake wa mazungumzo na amani, akihimiza pande zinazozozana kusitisha mapigano mara moja na kuanza tena mazungumzo,
"Ninarudia wito wangu kwa pande zinazopigana kukubaliana na kusitisha mapigano mara moja na kuanza tena mazungumzo ili kufikia usitishaji wa kudumu wa mapigano na mchakato wa kisiasa unaojumuisha wote na unaosimamiwa na Sudan wenyewe."

Shambulio hilo huko Kordofan Kusini linaashiria ongezeko la vurugu dhidi ya wafanyakazi wa Umoja wa Mataifa, na kuonesha hatari endelevu zinazokabili walinda amani katika maeneo hatarishi ya Sudan.