TAMWA Zanzibar Yazifikia Shule Kuimarisha Ulinzi wa Mtoto wa Kike

NA ABDUL SAKAZA

Mtoto wa kike ana haki ya kuishi katika mazingira salama, kupata elimu, kushiriki katika nafasi za uongozi na kulindwa dhidi ya aina zote za udhalilishaji, ikiwemo ukatili wa kijinsia na ndoa za utotoni. Hata hivyo, utekelezaji wa haki hizo unahitaji ushirikiano wa familia, skuli, jamii na taasisi zinazohusika na ustawi na ulinzi wa watoto.

Katika kuadhimisha Siku ya Kimataifa ya Mtoto wa Kike, Chama cha Waandishi wa Habari Wanawake Tanzania Zanzibar (TAMWA Zanzibar) kimepeleka elimu kwa wanafunzi wa Skuli ya Msingi Kinyasini, Chaani, Mkoa wa Kaskazini Unguja, na Skuli ya Msingi Dunga pamoja na Bambi, Mkoa wa Kusini Unguja, kwa lengo la kuwajengea uelewa kuhusu haki zao, namna ya kujikinga na udhalilishaji pamoja na umuhimu wa kujitambua na kujiamini.

Akizungumza kuhusu umuhimu wa kulinda haki za watoto wa kike, Bi. Safia Ngalapi, Meneja wa Mawasiliano wa chama hicho , amesema mtoto wa kike ana haki ya kulindwa dhidi ya aina zote za udhalilishaji na kupatiwa haki zake zote.

Ngalapi ameongeza kuwa utoaji wa elimu hiyo ni sehemu ya juhudi za kuhamasisha watoto, walimu na jamii kwa ujumla kutambua kuwa ulinzi wa mtoto wa kike si jukumu la familia pekee, bali ni wajibu unaohusisha skuli, jamii, taasisi za serikali na mashirika yanayotetea haki za watoto.

Akitoa elimu kwa wanafunzi wa Skuli ya Msingi Kinyasini, Afisa Ustawi wa Jamii wa Wilaya ya Kaskazini A, Makame Makame, ameeleza umuhimu wa Siku ya Kimataifa ya Mtoto wa Kike katika kuhamasisha jamii kutambua haki, mahitaji na changamoto zinazowakabili watoto wa kike.

Amesisitiza umuhimu wa kuhakikisha watoto wa kike wanapata fursa sawa za kukua, kujifunza na kufikia malengo yao bila kukabiliwa na vitendo vinavyoweza kuhatarisha usalama wao au kuathiri mustakabali wa maisha yao.

KWANINI TAMWA ZANZIBAR IMEPELEKA ELIMU MASHULENI?

Akizungumzia maadhimisho hayo, Hairat Haji, Afisa Programu kutoka TAMWA Zanzibar, amesema Siku ya Kimataifa ya Mtoto wa Kike huadhimishwa ili kukumbusha jamii wajibu wake katika kuwalinda watoto wa kike dhidi ya vitendo vya udhalilishaji wa kijinsia na kuhakikisha wanapata haki zao.

Amesema TAMWA Zanzibar imeamua kupeleka elimu hiyo mashuleni ili kupata fursa ya kuzungumza moja kwa moja na wanafunzi kuhusu changamoto zinazoweza kuathiri maisha yao na namna wanavyoweza kutafuta msaada wanapokabiliwa na vitendo vya ukatili.

“Shule ni miongoni mwa maeneo muhimu katika kuimarisha ulinzi wa watoto kwa sababu walimu na walezi wanaweza kusaidia kutambua mabadiliko katika mwenendo wa mwanafunzi, kutoa muongozo na kuwaunganisha watoto wanaohitaji msaada na mamlaka husika,” amesema Khairat.

Ameeleza kuwa elimu kuhusu haki za mtoto wa kike inapaswa kuendelea kutolewa ili kuwasaidia wanafunzi kutambua vitendo vya udhalilishaji, kuelewa haki zao na kujua mahali pa kuripoti wanapokabiliwa na changamoto zinazohatarisha usalama wao.

Katika hatua nyingine, Khairat amewataka watoto wa kike kujitambua na kuthubutu kugombea nafasi za uongozi katika nyanja mbalimbali, akisisitiza umuhimu wa kujiamini na kutumia fursa zinazopatikana shuleni na katika jamii.

WAZAZI NA JAMII WATAKIWA KUUNGA MKONO JUHUDI HIZO

Kwa upande wake, Adam Haruna, mchambuzi wa masuala ya elimu na jinsia, amesema juhudi za TAMWA Zanzibar zinahitaji kuungwa mkono na wazazi na walezi kwa kuwajengea watoto mazingira ya kuzungumza kwa uhuru kuhusu changamoto wanazokutana nazo, bila hofu ya kulaumiwa, kutishwa au kudhalilishwa zaidi.

“Mtoto anapopata nafasi ya kueleza tatizo lake na kusikilizwa, inakuwa rahisi zaidi kwa watu wanaowajibika kuchukua hatua zinazofaa kumlinda na kumsaidia,” amesema Adam Haruna.

Amesisitiza umuhimu wa jamii kushirikiana katika kuhakikisha watoto wa kike wanakua katika mazingira yanayowapa nafasi ya kupata elimu, kujenga uwezo wao na kutimiza ndoto zao.

UJUMUISHI NI HAKI

Mafunzo hayo hayakuacha nyuma masuala ya ujumuishi wa jinsia zote katika kupata elimu, nafasi za uongozi na haki ya kushiriki na kushirikishwa. Mbaya Ali Haji kutoka baraza la watu wenye ulemavu ameelezea watoto wenye ulemavu wana haki ya kupendwa kusaidiwa , kusikilizwa fikra na mitazamo yao pia kupewa fursa sawa bila kujali haliya ulemavu wao.

‘’Ni makossa kisheria kumuita majina mabaya mtu mwenye ulemavu , hapa nitayataja majina ambayo ni sahihi kuwaita watu wenye ulemavu, kuna kiziwi, mtu mwenye ulemavu wa viungo, asieona, na mtu mwenye ualbino’’

Akizungumzia Atari za ndoa za umri mdogo Afisa Programu wa TAMWA-ZNZ Asia Hakim ameeleza kuwa watoto wa kike hushindwa kufikia malengo yao baada ya kuolewa katika umri mdogo jambo ambalo huwafanya washuke kiuchumi, hukosa fursa za kujishuhulisha na uongozi, na badala yake kubaki kuwa tegemezi katika maisha yao.

 HISTORIA SIKU YA MTOTO WA KIKE

Kwa mujibu wa Umoja wa Mataifa, Siku ya Kimataifa ya Mtoto wa Kike ilitangazwa rasmi na Baraza Kuu la Umoja wa Mataifa tarehe 19 Desemba 2011 kupitia Azimio namba 66/170, na maadhimisho ya kwanza yalifanyika tarehe 11 Oktoba 2012.

Tangu wakati huo, siku hiyo imekuwa fursa ya kimataifa ya kuhamasisha serikali, mashirika ya kiraia, familia na jamii kuimarisha hatua za kulinda haki za watoto wa kike na kuhakikisha wanapata fursa za kuendeleza vipaji na uwezo wao.

Maadhimisho hayo yanaangazia changamoto zinazowakabili watoto wa kike, zikiwemo ukatili wa kijinsia, ndoa za utotoni, ubaguzi na vikwazo vinavyoweza kuwanyima fursa ya kupata elimu na kushiriki kikamilifu katika maendeleo ya jamii ambapo Kaulimbiu ya mwaka 2026 ya Siku ya Kimataifa ya Mtoto wa Kike ni “Komesha ndoa za utotoni na wekeza katika haki za mtoto wa kike.”

Kaulimbiu hiyo inasisitiza umuhimu wa kuchukua hatua za pamoja kuzuia ndoa za utotoni na kuwekeza katika elimu, ulinzi na maendeleo ya watoto wa kike huku Juhudi za TAMWA Zanzibar za kutembelea skuli na kutoa elimu zinaongeza nafasi ya kuwafikia wanafunzi moja kwa moja.