WANAHARAKATI WATAKA WANAUME KUWAJIBIKA KULINDA WATOTO DHIDI YA UKATILI WA KIJINSIA

Na Safia Mohd.

Katika juhudi za kupunguza vitendo vya ukatili na udhalilishaji wa kijinsia katika jamii, wanaharakati wa masuala ya kijinsia wameitaka jamii, hususan wanaume, kutimiza wajibu wao wa malezi na malezi ya watoto hata baada ya kutengana na wenza wao. Wamesema kukwepa majukumu hayo kunawaweka watoto katika mazingira hatarishi yanayoweza kuwafanya kujiingiza katika vitendo vya ukatili na udhalilishaji wa kijinsia.

Wito huo umetolewa katika mdahalo uliofanyika katika Ukumbi wa Waalimu Kiembesamaki, uliowakutanisha wanaharakati kutoka mikoa ya Kaskazini na Kusini Unguja. Mdahalo huo uliandaliwa na Taasisi ya FAWE Zanzibar ikiwa ni sehemu ya maadhimisho ya Siku ya Wanawake Duniani.

Wanaharakati waliohudhuria mdahalo huo wameeleza kuwa licha ya juhudi mbalimbali zinazofanywa, bado matukio ya ukatili wa kijinsia yanaendelea kutokea majumbani na mengi huripotiwa katika madawati maalum ya kushughulikia vitendo hivyo. Hali hiyo, wamesema, inaonesha umuhimu wa kuongeza juhudi za pamoja kati ya wanaharakati, serikali na jamii ili kupunguza matukio hayo.

Aidha, wamehimiza kuimarishwa kwa ushirikiano kati ya wanaharakati na jamii kwa lengo la kujenga uelewa mpana kuhusu madhara ya ukatili wa kijinsia, pamoja na kuendelea kupigania maendeleo ya mtoto wa kike katika sekta muhimu kama elimu na uchumi.

Kwa upande wao, Maafisa Miradi kutoka Taasisi ya Uwezeshaji Wanawake Kiuchumi ya FAWE Zanzibar, Bi. Maryam Juma Othman na Bi. Shakira Hasnuu Ismail, wamesema kongamano hilo limeandaliwa kwa lengo la kuikumbusha jamii, hususan wanawake, kutambua haki zao na kujiepusha na vitendo vya ukatili wa kijinsia.

Wamesema elimu na uhamasishaji vina nafasi kubwa katika kuwajengea wanawake uwezo wa kujilinda na kushiriki kikamilifu katika maendeleo ya jamii.

Naye mwakilishi kutoka Wizara ya Jinsia, Vijana, Wanawake, Maendeleo ya Jamii na Watoto kwa kushirikiana na Idara ya Vyama vya Ushirika, amesisitiza umuhimu wa wanawake kujitambua na kuthamini nafasi yao katika jamii. Amesema kutelekeza watoto ni kosa kisheria na ni kwenda kinyume na sheria za ulinzi wa mtoto zinazolenga kuhakikisha ustawi na usalama wa watoto wote.

Kongamano hilo la siku moja limeandaliwa na FAWE Zanzibar kwa kushirikiana na UN Women, likiwa ni sehemu ya maadhimisho ya Siku ya Wanawake Duniani ambayo huadhimishwa kila mwaka tarehe 8 Machi. Maadhimisho hayo yanalenga kuhamasisha usawa wa kijinsia, kuimarisha haki za wanawake, na kukuza nafasi ya wanawake katika maendeleo ya jamii.